ByteDance компаниясының негізін қалаушы 41 жастағы Чжан Имин Қытайдағы миллиардерлер рейтингінде көш бастады. Оның байлығы 49,3 млрд долларға бағаланған, деп хабарлайды Kazinform-ның меншікті тілшісі.
ByteDance-тің табысы өткен жылы 30 пайызға өсіп, 110 млрд долларға жетті, ал АҚШ-тағы TikTok қосымшасын пайдаланушылар саны 200 млн-ға жақындады.
Бөтелкедегі су өндірісі бойынша магнат, 70 жастағы Чжун Шаньшань соңғы үш жылда алғаш рет бірінші орыннан екінші орынға сырғыды
Үшінші орында – Tencent негізін қалаушы Пони Ма. Оның дәулеті 44,4 млрд долларға балағаланған. Өткен жылдың соңына қарай WeChat қосымшасын пайдаланушылар саны 1,3 млрд-қа жетті.
Hurun нұсқасы бойынша, Қытайдағы долларлық миллиардерлер саны 142-ге азайып, 753 адамды құраған.
Бұған дейін танымал әлеуметтік желіні Ресейде бұғаттау ұсынылған болатын. Ал Қырғызстанның Мәдениет, ақпарат, спорт және жастар саясаты министрлігі ел аумағында TikTok әлеуметтік желісін бұғаттау туралы шешім қабылдады. Қазақстанда да ресурсты бұғаттау туралы пікірталастар жүріп жатыр. Өзінің депутаттық сауалында сенатор Әлішер Сатвалдиев TikTok платформасында жағымсыз контенттің таралуы мәселесін көтерді. Мәжіліс депутаты Ерлан Саиров та қазақстандықтардың TikTok қолдануын шектеуге шақырды.
Еуропалық комиссия «Цифрлық қызмет көрсету туралы» заң (DSA) бойынша TikTok-қа қарсы ресми іс жүргізудің екінші раундын бастады.